“Drop box” i fshehur në OS X Lion

Mac OS X Hints ka zbuluar që Mac-ët që e ka sistemin OS X Lion dhe janë të regjistruar me iCloud e kanë një “drop box” të fshehur, në follderin e librarisë së përdoruesit që e mundëson sinkronizimin e lehtë të skedarëve dhe dokumenteve në mes të Mac-ëve. Një follder brenda ~/Library (të cilin Lion e fsheh) i cili quhet “Mobile Documents” përmban dokumentet iWork të sinkronizuara me pajisjet që përdorin iOS përgjatë iCloud.

“Përdorimi i tij është që çdo skedarë që vendoset në follderin ~/Library/Mobile Documents automatikisht do të ngarkohet në iCloud dhe do të vendoset në çdo Mac të cilin e keni që është i kyçur në të njëjtën llogari në iCloud dhe e ka të përzgjedhur pëlqimin “Document & Data’ iCloud,” thotë anëtari i Mac OS X Hints, CHM. “Lion madje ju lajmëron për konfliktet me version dhe ua mundëson që t’i rizgjidhni ato kur ju e hapni dokumentin.”

Ky funksionim është mjaft i ngjashëm me shërbimin e palës së tretë për sinkronizime, të quajtur Dropbox, por posedimi i këtij shërbimi në Mac si të fshehur e bën më pak të përdorshëm. Skedarët që shtohen në follderin Mobile Documents nuk sinkronizohen me pajisjet që e përdorin sistemin iOS, që është një veçori tjetër që Dropbox e ofron përgjatë aplikacionit të vet në iOS.

Ajo se çfarë është interesante për këtë follder të fshehur është që ai tregon që iCloud dhe OS X Lion kanë përcaktuar bazën për një rrugë të lehtë dhe zyrtare për sinkronizim të skedarëve në mes të Mac-ëve (dhe pajisjeve që përdorin iOS).

iCloud është relativisht shërbim i ri, duke qenë në lëshim publik për më pak se një muaj, kur po shkruhet ky artikull. Veçoritë e fshehura si follderi Mobile Documents duket që mund të tregojnë që Apple ka qëllime të tjera në mendje se sa vetëm sinkronizimi i dokumenteve në iWork.